-मित्रसेन दाहाल-
इतिहास कसैले पनि समाप्त पार्नुहुँदैन । हाम्रो कला, संस्कृति, मठ, मन्दिर, धारा, पाटी, पौवा, सालिक आदि सबैको संरक्षण गर्नु पर्दछ । यी नै हाम्रा मौलिक सम्पत्ति हुन् । यी अमूल्य सम्पत्तिको जगेर्ना र संरक्षण गर्नु सबैको परम कर्तव्य हो ।
उपत्यकाको सडक, ढल, खानेपानी, बिजुली, टेलिफोन र बसोबासलाई व्यवस्थित गरी नमुना राजधानी बनाउनका लागि सम्बन्धित सबै एकजुट भएर लाग्न ढिलो भइसकेको छ । काठमाडौ उपत्यकालाई दिनानुदिन यसैगरी अस्तव्यवस्त रुपमा बिगार्ने र गैरजिम्मेवार हुने हो भने यो अझ कुरुप हुने निश्चित छ । सरकारलाई बिउँझाएर काठमाडौ उपत्यकाको मौलिक र पहिचान जोगाउनका लागि सबै काठमाडौ बासी आन्दोलित हुनु अहिलेको आवश्यकता भइसकेको छ ।
राजधानीको समस्या र घरभाडा
काठमाडौं उपत्यका दिनानुदिन अस्तव्यस्त र अव्यवस्थित हुन थालेको छ । विभिन्न बहानामा नेपाल अधिराज्यका विभिन्न जिल्लाबाट राजधानी सहर आउने व्यक्तिहरुको क्रम झन बढ्न थालेको छ । सवारीसाधन अत्याधिक भएका कारण ट्राफिक व्यवस्था मिलाउन मुस्किल परिरहेको छ । बाटोको अनुपातमा सवारीसाधनको चाप भएका कारण सडक अस्तव्यस्त बन्दै गएको छ । बाटो नथपिने तर दैनिक रुपमा सवारीसाधनहरु भने थपिइरहेका छन् । पानीको स्रोत र बिजुलीको क्षमता बढेको छैन । राजधानीमा जनसंख्या बढिरहेको छ । काठमाडौ उपत्यकालाई व्यवस्थित गर्नका लागि प्राथमिकताका साथ कुनै पनि दलको सरकार आजसम्म गम्भीर रुपमा लागेको छैन । यतिखेर काठमाडौमा कुनै भवितव्य भयो भने उद्धार गर्ने ठाउँसमेत बाँकी राखिएको छैन । काठमाडौका पुराना तथा भित्री सहरी भागमा दमकल र एम्बुलेन्सजस्ता अत्यावश्यक उद्धारका साधन छिराउने बाटोमा समेत घर बनाउन बाँकी राखिएको छैन ।
काठमाडौ उपत्यकामा ग्यासको भण्डार छ भन्ने पनि आजकाल सुनिन्छ । यसबाट विष्फोटन हुने हो कि भन्ने डर झनै बढिइरहेको छ ।
काठमाडौ उपत्यका यति धेरै अस्तव्यस्त भइसक्दा पनि यसतर्फ सरकारको खासै ध्यान जानसकेको छैन यो बडो दुःखद् कुरा हो । क्रमशः
