देशका समस्या पहिचान गर्ने कुरामा सत्ता गठबन्धन अघि बढेको जिकीर

काठमाडौं । प्रधानमन्त्री पुष्पकमल दाहालले चीनको सिमानामा रहेका व्यापारिक नाका नियमित सञ्चालन हुने बताएका छन् । नेकपा (माओवादी केन्द्र) मुस्ताङ शाखाले जोमसोममा आयोजना गरेको कार्यकर्ता भेलालाई सम्बोधन गर्दै उनले हालै चीन भ्रमणका क्रममा १४ वटा व्यापारिक नाका नियमित सञ्चालन गर्ने समझदारी भएको जानकारी गराएका छन् । नेपालको प्रमुख चुुनौतीका रूपमा रहेको भ्रष्ट्राचारविरुद्ध सरकारले थालेको शुसासनको अभियान नरोकिने पनि प्रधानमन्त्री दाहालले बताएका छन् । गठबन्धनले पाँचै वर्ष सरकार चलाउने बताउँदै उनले सत्ता बाहिर रहँदा केही नेताहरुलाई छटपटी भएकोसमेत टिप्पणी गरेका छन् । त्यसैगरी नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले देशलाई प्रतिगमनको दिशामा लैजान खोज्ने कुनै कार्य स्वीकार्य नहुने बताएका छन् । नेकपा एकीकृत समाजवादी जिल्ला कमिटी भक्तपुरले आयोजना गरेको शुभकामना आदानप्रदान तथा चियापान कार्यक्रममा बोल्दै पूर्वप्रधानमन्त्री नेपालले कसैलाई जनताको साथ छ भन्ने लाग्छ भने पार्टी खोलेर वा पुरानै पार्टीबाट चुनाव लडेर देखाउन चुनौती दिएका छन् । संविधानलाई मास्न खोज्ने, प्रतिगमनको दिशामा लैजान खोज्ने र पुरानै अवस्थामा यो देशलाई फर्काउन खोज्ने तत्वप्रति सबै होसियार हुनुपर्ने अध्यक्ष नेपालको भनाई थियो । पूर्व राजा ज्ञानेन्द्र शाहप्रति सङ्केत गर्दै उनले कुनै वंशको शासन नेपालमा नेपाली जनतालाई स्वीकार्य नरहेको बताएका छन् । देशका समस्या पहिचान गर्ने कुरामा सत्ता गठबन्धन अघि बढेको बताउँदै यो गठबन्धन ५ वर्षको लागि बनाएको बताएका छन् । समाजवादी मोर्चाले सत्ता गठबन्धनलाई झन् बलियो बनाउने बताउँदै सरकार एकताबद्ध भएर अघि बढ्ने उल्लेख गरेका छन् । त्यसैगरी नेकपा एमालेले गाजा शहरमा भएको आक्रमणको निन्दा र भत्सर्ना गरेको छ । एक वक्तव्य जारी गर्दै एमाले अध्यक्ष केपी शर्मा ओलीले अस्पतालमा उपचार गराइरहेका बिरामी, उपचारमा संलग्न चिकित्सक तथा स्वास्थ्यकर्मी लगायत गरी ५ सय भन्दा बढी मारिएको खबरले स्तब्ध भएको बताएका छन् । इजरायली हवाई आक्रमणमा करिब ५ सय जनाको मृत्यु भएको खबर सार्वजनिक भएपछि एमालेले त्यसको विरोध गरेको हो । उनले नेकपा (एमाले) शान्तिको पक्षमा रहेको बताएका छन् । ओलीले निहत्था नागरिक, अस्पतालमा उपचार गराइरहेका बिरामी र स्वास्थ्यकर्मीको ज्यान लिने गरी गरिएको अमानवीय आक्रमणबाट अन्तर्राष्ट्रिय कानुन, मानव अधिकार र मानवीयताका सबै सीमा उल्लङ्घन भएको बताएका छन् । उनले क्रूर र अमानवीय आक्रमण तत्काल रोकिनुपर्ने बताएका छन् ।