– अर्जुननरसिंह के.सी. –
सभापति कोइरालालाई कार्यसमिति हेरफेर गर्न मनोनित सबै सदस्यहरुले राजीनामा दिएपछि उहाँले २०५४ कार्तिक १९ गते उपसभापति पद हटाउनुभयो भने दुईमध्ये उक महामन्त्रीमा सुशील कोइरालाको स्थानमा बासुदेव रिसाललाई मनोनित गर्नुभयो । सदस्य मङ्गलादेवीको निधन भयो । सदस्यहरुमा महेन्द्रनारायण निधि, शेख इद्रिसको सट्टा लीला कोइराला, गाविन्दराज जोशी, अर्जुननरसिंह केसी, रामशरण महत, रामकृष्ण ताम्राकार, चक्रप्रसाद बास्तोला, बलदेव शर्मा मजगैयाँ, सुरेन्द्र चौधरी र गोपाल राईलाई सदस्यमा थप मनोनित भए । त्यसै वर्ष माघ १२ को हेरफेरमा योगप्रसाद उपाध्याय थपिनुभयो । २०५५ असोज २० गतेको हेरफेरमा सुशील कोइरालालाई उपसभापति बनाइयो । २०५६ साल साउन १० गतेको हेरफेरमा सुशील कोइराला एकल महामन्त्री बन्नुभयो । सोही हेरफेरमा महेश्वरप्रसाद सिंह, कृष्णप्रसाद सिटौला, लक्ष्मण घिमिरे, गोपालराज पहाडी, विनयध्वज चन्द, नरहरि आचार्य, जयप्रकाशप्रसाद गुप्ता, शिवराज जोशी सुर्खेत, प्रेमलाल सिंह, रेवतीप्रसाद भुसाल, सुनीलकुमार भण्डारी र वालकृष्ण खाँड मनोनयद्वारा केन्द्रीय कार्यसमितिको सदस्यमा आउनुभयो ।
दशांै महाधिवेशन २०५७ ः पोखरा (दीपेन्द्र सभागृह, नयाँ सडक)
काँग्रेसको दशौं महाधिवेशन, नवौ महाधिवेशनको करिब ५ वर्षपछि २०५७ माघ ६ देखि १० गतेसम्म पोखरामा सम्पन्न भयो । सो अधिवेशनमा सभापतिको प्रतिद्वन्दी बन्नुभएका शेरबहादुर देउवाले पाएको ५०७ मत तथा रामहरि जोशीले पाएको १० मतविरुद्ध गिरिजाप्रसाद कोइरालाले ९३६ मतद्वारा निर्वाचित हुनुभयो । महाधिवेशनले पहिलोपटक १८ जना केन्द्रीय सदस्यहरु निर्वाचित गर्यो । निर्वाचित सदस्यहरुले पाएको मत (कोष्ठमा) वरियाताअनुसार रामचन्द्र पौडेल (१०१५), शैलजा आचार्य (८९८), प्रकाशमान सिंह (८५०), खुमबहादुर खड्का (८१२), प्रकाश कोइराला (७९४), महेश आचार्य (७८१), सुशील कोइराला (७७६), प्रदीप गिरी (६६२), नरहरि आचार्य (६५३), अर्जुननरसिंह केसी (६५२), कृष्णप्रसाद सिटौला (५९६), बलदेव शर्मा मजगैयाँ (५५३), महन्थ ठाकुर (५८३), बलबहादुर राई (५८०), विजयकुमार गच्छदार (५७५), गोविन्दराज जोशी (५६९), विमलेन्द्र निधि (५६६) र गिरञ्जीवी वाग्ले (५४०) निर्वाचित हुनुभयो ।
महाधिवेशनको लगत्तै सभापति कोइरालाले महामन्त्रीमा सुशील कोइराला, कोषाध्यक्षमा महन्थ ठाकुर, सहमहामन्त्रीमा गोविन्दराज जोशी र प्रवक्तामा नरहरि आचार्यलाई मनोनित गर्नुभयो ।
सदस्यमा कृष्णप्रसाद भट्टराई, शेरबहादुर देउवा, बासुदेव रिसाल, नोना कोइराला, कुलबहादुर गुरुङ, डा. रामवरण यादवलाई मनोनित हुनुभयो ।
चक्रप्रसाद बाँस्तोला, डा. रामशरण महत, दिलबहादुर घर्ती, रामकृष्ण ताम्राकार, लक्ष्मणप्रसाद घिमिरे, गोपालराज पहाडी, विनयध्वज चन्द, सुनिलकुमार भण्डारी, फरमुल्लाह मन्सुर र पूणर्कुमार शेर्मालाई पनि सदस्य बनाइयो । यीमध्ये नौजना महाधिवेशनको निर्वाचनमा सदस्यका असफल उम्मेदवार हुनुहुन्थ्यो ।
एघारौं महाधिवेशन २०६१ ः ललितपुर (सानेपा)
२०६० सालमै सम्पन्न हुनुपर्नेमा असाधारण परिस्थिति उत्पन्न भएको भनी एघारौ महाधिवेशन एक वर्ष पर सारेर २०६१ फागुन १९ देखि फागुन २२ सम्म वीरगञ्जमा हुने निणर्य गरिएको थियो । राजाको प्रत्यक्ष हुकुमी शासन चलेकोले पुनःस्थगित गरी भदौ १४, २०६२ मा काठमाडौमै यो महाधिवेशन सम्पन्न गरियो । १८ लाख रुपैयाँ तिरेर नयाँ बानेश्वरको अन्तर्राष्ट्रिय सम्मेलन केन्द्र बुक गरिए पनि अन्त्यमा आएर तत्कालीन शाही सत्ताले उक्त स्थल उपलब्ध नगराएपछि महाधिवेशनको उद्घाटन समारोह जावलाखेलस्थित चिडियाखाना अगाडिको मैदानमा र बन्द सत्रहरु केन्द्रीय कार्यालय सानेपा को प्राङ्गणमा सम्पन्न गरेको थियो । क्रमशः
