ब्राउनसुगरसहित दुई पक्राउ

काठमाडौं । पर्सा, वीरगंज महानगरपालिका-१६ सिंहाई पुलबाट अवैध लागूऔषध ब्राउनसुगर जस्तो देखिने पदार्थ ३ सय मिलिग्रामसहित २ जनालाई बिहान प्रहरीले पक्राउ गरेको छ । पक्राउ पर्नेहरुमा सोही महानगरपालिका-१६ नागवा बस्ने १९ वर्षीय सुनिल साह तुरहा र ३३ वर्षीय विशाल पटेल रहेका छन् । जिल्ला प्रहरी कार्यालय पर्साबाट खटिएको प्रहरीले ना.५७ प ४४८४ नम्बरको मोटरसाइकललाई जाँच गर्ने क्रममा मोटरसाइकलमा सवार उनीहरूलाई उक्त पदार्थसहित पक्राउ गरेको हो । त्यस्तै ईलाम, सूर्योदय नगरपालिका-४ आर्दश टोल बस्ने ५५ वर्षीय वीर तामाङ सोही नगपरालिका-४ तेर्सेस्थित बाँसघारीमा मृत अवस्थाम फेला परेका छन् । चितवन, भरतपुर महानगरपालिका-१ पोखरा बसपार्कस्थित प्रतिक्षालयमा हाल नाम,थर, वतन नखुलेका अन्दाजी ७० वर्षीय पुरुष मृत अवस्थामा फेला परेका छन् । यसैगरी चितवन, रत्ननगर नगरपालिका-३ बेल्सीस्थित कयरकाली मुकतेश्वर महादेव मन्दिरको धर्मशालामा हाल नाम, थर, वतन नखुलेका अन्दाजी ६५ वर्षीय पुरुष मृत अवस्थामा फेला परेका छन् । त्यस्तै मध्यबिन्दु नगरपालिका-५ पतवारी बस्ने ७६ वर्षीया मन कुमारी बोहराको भान्सा कोठामा आगलागी हुँदा करिब १ लाख रुपैयाँ बराबरको धनमाल जलेर नष्ट भएको छ । आगो ताप्ने क्रममा भान्साकोठाबाट गोठमा समेत आगलागी भएको बताइएको छ । आगोले जलेर घाइते भएकी मन कुमारीको मध्यबिन्दु जिल्ला अस्पताल डण्डामा हुँदै थप उपचारका लागि भरतपुर सरकारी अस्पताल पठाइएको छ । प्रहरीले स्थानीय बासिन्दाको सहयोगमा आगो लागि नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।