उत्पादन बृद्धि र रोजगारी प्रवर्धन हुनेगरी नया“ कार्यक्रम प्रस्तुत गर्न दाहालको निर्देशन

काठमाडौं । प्रधानमन्त्री पुष्पकमल दाहाल ‘प्रचण्ड’ले उत्पादन वृद्धि र रोजगारी प्रवर्धन हुनेगरी नयाँ कार्यक्रम प्रस्तुत गर्न राष्ट्रिय योजना आयोगलाई निर्देशन दिएका छन् । प्रधानमन्त्री कार्यालयमा राष्ट्रिय योजना आयोगका नवनियुक्त सदस्यहरूलाई बोलाएर प्रधानमन्त्री प्रचण्डले विद्यमान समस्या समाधान गर्नेगरी योजना तयार गर्नुपर्नेमा जोड दिएका हुन् । उत्पादन र रोजगारी न्यून हुनु देशको प्रमुख समस्या भएको उल्लेख गर्दै प्रधानमन्त्री प्रचण्डले अर्थतन्त्रको हरेक क्षेत्रमा समस्या देखापर्ने, एक क्षेत्रको समस्या समाधान गर्न खोज्दा अर्को क्षेत्रमा समस्या झन बल्झिने अवस्थालाई सम्बोधन गर्न जरूरी रहेकोसमेत बताएका छन् । १६ औं योजनाको कार्यान्वयन अन्तिम चरणमा पुगेका योजनालाई अन्तिम रूप दिने प्रक्रिया अघि बढाउन र योजनामा प्रस्ताव गरिएका रणनीति र कार्यक्रमहरूलाई आगामी वर्षको बजेट निर्माणको क्रममा समावेश गर्न आयोगलाई प्रधानमन्त्रीको निर्देशन रहेको छ । १६ औं योजनाले प्रमुख रूपमा देशभित्र उत्पादन र रोजगारी बढाउने दिशामा नयाँ खालका नतिजामूलक कार्यक्रमलाई अघि बढाउनु पर्नेमा उनले जोड दिएका छन् । यसैबीच उपप्रधान एवं गृहमन्त्री रवि लामिछानेले वैदेशिक रोजगारीमा जाने श्रमिकलाई अमर्यादित र अभद्र व्यवहार नगर्न अध्यागमनका कर्मचारीलाई निर्देशन दिएका छन् । उनले कालिकास्थान स्थित अध्यागमन विभागको ब्रिफिङमा यस्तो निर्देशन दिएका हुन । उनले रेमिटेन्स पठाएर अर्थतन्त्रमा योगदान दिने श्रमिकलाई विमानस्थलमा जाँदा-आउँदा गरिने अमर्यादित र अभद्र व्यवहार नगर्न तथा अनावश्यक दुःख, कष्ट र हैरानी दिने प्रवृत्ति तत्काल सुधार्न निर्देशन दिएका छन् । गृहमन्त्री लामिछानेले ती श्रमिकलाई सहानुभूतिसहित सकारात्मक व्यवहार गरी सेवाग्राहीलाई परिवर्तनको अनुभूति गराउन आग्रह गरेका छन् । उनले विदेशीका लागि अध्यागमन देशको मुहार रहेको उल्लेख गर्दै देशप्रति सकारात्मक धारणा बनाउन अध्यागमन सुधारका योजना ल्याउन पनि निर्देशन दिनुभएको छ । उनले अध्यागमनलाई अन्तर्राष्ट्रिय मापदण्डअनुसार प्रविधिमैत्री बनाउनु पर्ने पनि बताएका छन् । त्यस्तै नेकपा एमालेका वरिष्ठ उपाध्यक्ष ईश्वर पोखरेलले तत्काल वामपन्थी पार्टी एक हुने अवस्था नरहेको बताएका छन् । नेकपा एमाले उदयपुरको नवौँ जिल्ला अधिवेशनको उद्घाटन गर्दै पोखरेलले अहिलेको अवस्थामा पार्टी एक बनाउने पक्षमा एमाले नरहेको स्पष्ट पारेका हुन् । उनले यो गठबन्धन मुलुकको समृद्धि र हितमा रहेको दावी गरेका छन् । नयाँ गठबन्धनले मुलुकमा नयाँ खालको राजनैतिक समीकरण प्रारम्भ भएको बताएका छन् । उनले अहिलेको सत्ता गठबन्धनलाई देश बनाउने सपनाहरुलाई साकार पार्न महत्वपूणर् कामको थालनी भएको र यसलाई जोगाएर अगाडि बढ्नु सत्ता साझेदार दलहरुको आवश्यकता रहेको बताएका छन् । वरिष्ठ उपाध्यक्ष पोखरेलले आर्थिक विकास र समृद्धिको अभियान बीचैमा अलपत्र भएर लथालिङ्ग भएको अवस्थामा अहिलेको सरकार निर्माण गरिएकोले अब देशले राजनैतिक निकास पाउने र विकासले फड्को मार्ने दाबी गरेका छन् । उनले यहि गठबन्धनबाट एमालेले मिसन २०८४ को लक्ष्य हासिल गर्ने पनि बताएका छन् ।