सभामुख घिमिरे एमालेको निर्देशन अनुसार अघि बढेको आरोप

काठमाडौँ । प्रतिनिधि सभाको बैठकमा प्रमुख प्रतिपक्षी दल नेपाली कांग्रेसले आफ्नो अवरोध जारी राखेको छ । प्रतिनिधिसभाको बैठक शुरु हुनासाथ कांग्रेसका सांसदहरुले वेल घेराउ गर्दै नाराबाजी शुरु गरेका थिए । नाराबाजीका बीच सभामुखले बैठक अगाडी बढाउन खोजेपछि प्रतिनिधिसभामा तनाव देखिएको थियो । यसअघि पटक पटक सहमतिका प्रयास भएपनि ठोस सहमति हुन नसक्दा कांग्रेसले आफ्नो अवरोध जारी राखेको छ । त्यसैगरी नेपाली कांग्रेसले सभामुख देवराज घिमिरे नेकपा (एमाले) को निर्देशन अनुसार अघि बढेको आरोप लगाएका छन् । संसद् बैठकपछि सञ्चारकर्मीलाई प्रतिक्रिया दिँदै कांग्रेसका सांसद प्रकाशशरण महतले सभामुख घिमिरे पार्टीको निर्देशन अनुसार अघि बढेको आरोप लगाएका हुन् । संसदीय विधिको बर्खिलाप त्यसको रक्षा गर्न बसेको सभामुखले पार्टी नेतृत्वको निर्देशनमा पुग्नु दुर्भाग्यपूणर् भएको उनको भनाइ छ । वेलमा विपक्ष दल निस्कदा पनि सभामुखले सदन सञ्चालन गर्नु संसदीय इतिहासमा सबैभन्दा अर्मयादित भएको उनले टिप्पणी गरेका छन् । यसैबीच नेकपा एमालेका सांसद रघुजी पन्तले आफ्ना दलका नेता केपी शर्मा ओलीमाथि आक्रमण प्रयास भएको बताएका छन् । प्रमुख प्रतिपक्षी दलका सांसदहरूले आफ्ना नेतामाथि आक्रमण प्रयास गरेको उनले दावी गरेका छन् । कांग्रेसले असंसदीय व्यवहार देखाएको उनको आरोप छ । त्यसैगरी सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले प्रमुख प्रतिपक्षी जिम्मेवार नदेखिएको आरोप लगाएकी छन् । सरकारका मन्त्रीहरू बस्ने स्थानमा प्रतिपक्षी दलका सांसदहरू छिर्नु गैरसंसदीय अभ्यास भएको उनको भनाइ छ । उनले गृहमन्त्रीलाई बोल्न दिइने सहमति भए पनि प्रतिपक्षी दलले अन्त्यमा भाँडेको आरोप लगाइन् ।