गृहमन्त्री लामिछानेले आधारहीन कुरा गरी का“ग्रेस सांसदहरुको मानमर्दन गरेको आरोप

काठमाडौँ । प्रमुख प्रतिपक्ष दल नेपाली कांग्रेसले केन्द्रीय समिति र संसदीय दलको संयुक्त बैठक बोलाएको छ । जेठ ९ गते बुधबार बिहान ११ बजे पार्टी केन्द्रीय कार्यालयमा बस्ने गरी बैठक बोलाइको मुख्यसचिव कृष्णप्रसाद पौडेलले बताएका छन् । उनका अनुसार बैठकमा पछिल्ला समसामयिक राजनीतिक घटनाक्रमको बारेमा पनि छलफल हुने भएको छ । कांग्रेसले उपप्रधान तथा गृहमन्त्री रवि लामिछानेमाथि सहकारी प्रकरणमा छानबिन गर्न संसदीय समितिको माग गर्दै आइरहेको छ । तर, समिति बनाउन दुवै पक्ष तयार भए पनि सहमति भाँडिएपछि कांग्रेसले पार्टीको रणनीति बनाउन बैठक राखेको बताइएको छ । त्यस्तै नेपाली कांग्रेसका उपसभापति एवं सांसद धनराज गुरूङले उपप्रधान तथा गृहमन्त्री रवि लामिछानेलाई कारबाहीको माग गर्दै सभामुखलाई पत्र लेखेका छन् । गृहमन्त्री लामिछानेले संसदमा अर्थहीन र आधारहीन कुरा गरी कांग्रेस सांसदहरूको मानमर्दन गर्न खोजेको र उनको अभिव्यक्ति प्रतिनिधिसभा नियमावली विपरीत भएको भन्दै संसदको अवेहलनामा कारवाही गर्न गुरूङले माग गरेका छन् । उनले रातो पासपोर्टमा आफूले अदालतबाट सफाइ पाइसकेको विषयलाई तोडमोड गरी नागरिकमा भ्रम सृजना गरेर आफूलाई अदालतभन्दा माथि राखी अभिव्यक्ति गरेको जिकिर गरेका छन् । यसैबीच प्रधानमन्त्री पुष्पकमल दाहाल ‘प्रचण्ड’ले कांग्रेसको अहिलेको क्रियाकलापको नतिजा आगामी चुनावमा देखिने टिप्पणी गरेका छन् । संसद भवनमा कांग्रेसले कस्तो मूल्य चुकाउनुपर्ने हो भन्ने सञ्चारकर्मीको प्रश्नमा प्रधानमन्त्री प्रचण्डले यो अब आउने चुनावमा देखिने प्रतिक्रिया दिएका छन् । पटकपटक विश्वासको मत लिने अवस्थाका विषयमा प्रतिक्रिया दिँदै प्रधानमन्त्री प्रचण्डले नेपालमा मात्रै नभइ विश्वमा पनि पटकपटक विश्वासको मत लिनुपर्ने घटना भएको भन्दै जरुरी परे १०–१२ पटक विश्वासको मत लिने जिकिर गरेका छन् । प्रधानमन्त्री प्रचण्डले चौथौपटक विश्वासको मत प्राप्त गरेका हुन् ।