काठमाडौं । नेकपा एमालेले प्रधानमन्त्री केपी शर्मा ओलीलाई विश्वासको मत दिन ह्वीप जारी गरेको छ । एमाले संसदीय दलका मुख्य सचेतक महेश बर्तौलाले एमालेका सांसदलाई आइतबार बस्ने प्रतिनिधिसभाको बैठकमा अनिवार्य उपस्थित हुन ह्वीप जारी गरेका हुन् । निर्देशनमा भनिएको छ, ‘साउन ६ गते बस्ने प्रतिनिधिसभाको बैठकमा सम्माननीय प्रधानमन्त्रीज्यूले विश्वासको मतका लागि प्रस्ताव पेस गर्नुहुने भएकोले अनिवार्य उपस्थित भई विश्वासको मत माग्ने प्रस्तावको पक्षमा मतदान गर्नुहुन ह्वीप जारी गरिएको जानकारी गराउँदछु ।’ एमाले र कांग्रेसबीच नयाँ सत्ता समीकरण बनेपछि ओलीले असार २८ गते प्रधानमन्त्रीमा दाबी पेश गरेर ३० गते नियुक्त भएका हुन् । उनले संविधानको धारा ७६ (४) बमोजिम प्रधानमन्त्रीले विश्वासको मत लिन लागेका हुन् । विश्वासको मतको लागि कांग्रेस एमाले सरकारले दुई तिहाइ मत प्राप्त गर्ने भएको छ । विद्यमान प्रतिनिधिसभामा रहेको २ सय ७५ मध्ये प्रधानमन्त्रीको पक्षमा दुई तिहाइ मत प्राप्त हुने निश्चित भएको छ । प्रतिनिधिसभामा नेपाली कांग्रेसको ८८ र एमाले ७९ सिट छ । जसमा एमालेका एक जना सभामुख र एक जना निलम्बित छन् । एमालेको ७७ मत हुन्छ । प्रतिनिधि कांग्रेस र एमालेको १ सय ६५ मत हुन्छ । २७५ को दुई तिहाइ १८४ हुन्छ । ओलीले दुई तिहाइ मत पाउने निश्चित भएको छ । यसैबीच नेपाली काँग्रेसले संसदीय दलको बैठक बोलाएको छ । कांग्रेसले आइतबार बिहान १२ बजे बस्ने गरि संसदीय दलको बैठक बोलाएको हो । बैठक संघीय संसद भवन नयाँ वानेश्वर, ल्होत्से हल नयाँ बानेश्वर काठमाडौंमा हुने भएको बताइएको छ । प्रधानमन्त्री केपी शर्मा ओलीले आइतबार विश्वासको मत लिने तयारी गरिरहेका बेला कांग्रेसले संसदीय दलको बैठक बोलाएको हो । कांग्रेस-एमाले गठबन्धनको सरकारले संसदमा दुई तिहाई बहुमत पुर्याउने कसरत गरिरहेका छन् ।
