उच्च मनोबलका साथ कार्यसम्पादन गर्न कर्मचारीलाई निर्देशन

काठमाडौं । नेपाल मजदुर किसान पार्टीका सांसद प्रेम सुवालले विदेशमा सम्पती राख्न नपाउने कानूनी व्यवस्था गर्न सरकारसँग माग गरेका छन् । प्रतिनिधि सभा बैठकमा बोल्दै उनले सो कुरा बताएका हुन् । सम्पत्तिको सीमांकन र विदेशमा सम्पती राख्न नपाउने कानून बनाउन जरुरी भएको उल्लेख गर्दै सांसद सुवालले सो व्यवस्था भए न्युन ज्याला, खराब कार्यस्थल लगायत अन्य विषयमा हुने हड्ताल र संघर्षलाई सम्बोधन गर्न सकिनेतर्फ पनि सरकारको ध्यानाकर्षण गराएका छन् । त्यस्तै सांसद सुवालले धनीहरुको सम्पती सामाजिकीकरण गर्न पनि सरकारलाई सुझाव दिएका छन् । यसैबीच ऊर्जा, जलस्रोत तथा सिँचाइमन्त्री दीपक खड्काले सरकारले राखेको लक्ष्यभन्दा पहिल्यै विद्युत निर्यात गर्नेगरी काम गर्न कर्मचारीलाई निर्देशन दिएका छन् । नेपाल विद्युत प्राधिकरणको ३९ औँ वार्षिकोत्सवको पूर्वसन्ध्यामा तालिम व्यवस्थापन विभाग खरिपाटीमा आयोजित ‘वृक्षारोपण कार्यक्रम’मा उनले सरकारले राखेको लक्ष्य समय अगावै पूरा गर्न कर्मचारीलाई निर्देशन दिएका हुन् । सरकारले १० वर्षमा १० हजार मेगावाट विद्युत भारत निर्यात गर्ने लक्ष्य लिएको छ । ऊर्जामन्त्री खड्काले सरकारले २८ हजार मेगावाट विद्युत उत्पादन गर्ने लक्ष्य लिएकाले लक्ष्य र उद्देश्यलाई परिपूर्ति गर्नका लागि उच्च मनोवलका साथ कार्यसम्पादन गर्न कर्मचारीलाई निर्देशन दिएका छन् । पछिल्लो समय नेपालको विद्युत भारतमा निर्यात गर्ने क्षमता बढेको उनको भनाइ थियो । उनले नेपालको ऊर्जा क्षेत्रमा विभिन्न देशले लगानी गर्न इच्छुक रहे पनि कानुनी झन्झटका कारण लगानी गर्न समस्या भइरहेको बताएका छन् । मन्त्री खड्काले विभिन्न देशले ऊर्जा क्षेत्रमा गरेको प्रगतिलाई हेरेर नेपालले समेत आफ्नो देशलाई प्रगतिको पथमा अगाडि बढाउन जरुरी रहेको उल्लेख गरेका छन् । त्यसैगरी नेपालका लागि चिनियाँ राजदूत छन सोङले नेपालको आर्थिक-सामाजिक विकासका निम्ति सक्दो सहयोग गर्न चीन तयार रहेको बताएका छन् । चाइना मिडिया ग्रुप र साइनो नेपाल मिडिया सोसाइटीद्वारा आयोजित कार्यक्रममा उनले नेपालको आर्थिक विकास चीनको चाहना भएको बताएका हुन् । राजदूत सोङले बेल्ट एन्ड रोड इनिसिएटिभ (बिआरआई) अन्तर्गतका परियोजना नेपालको हितमा रहेका बताउँदै चिनियाँ कम्युनिष्ट पार्टीको २०औँ केन्द्रीय समितिको तेस्रोे राष्ट्रिय बैठकले निर्दिष्ट गरेका सुधार योजना नेपाललगायत छिमेकी देशका लागि महत्वपूणर् भएको बताएका छन् । उनले सुधारका योजनाबाट दुवै देशका जनता लाभान्वित हुने विश्वास व्यक्त गरेका छन् । त्यस्तै उनले चिनियाँ कम्युनिष्ट पार्टीको बीसौँं केन्द्रीय समितिको तेस्रोे बैठकले चीनको निरन्तर सुधार र खुलापनको सन्देश प्रवाह गरेको बताएका छन् । उनले चिनियाँ कम्युनिष्ट पार्टी सुधार र खुलापनलाई दृढतापूर्वक उठाउँदै नयाँ युगको नयाँ यात्रामा लम्किरहेको स्पष्ट पारेका छन् । नेपाल कम्युनिष्ट पार्टी (एमाले)का केन्द्रीय सदस्य विष्णु रिजालले समानता, आपसी हित र दिगो मैत्रीप्रति दृढ विश्वास भएका नेपाल र चीनबीच सौहार्दपूणर् सम्बन्ध रहेको बताएका छन् । नेपाल र चीनबीचको सम्बन्ध सरकारीस्तरमा मात्र नभई जनस्तरमा पनि प्रगाढ बन्दै गएको बताउँदै उनले जनता-जनताबीचको सम्बन्ध आपसी लाभ र समझदारी प्रवद्र्धनका लागि उपयोगी भएको बताएका छन् ।