राज्य संयन्त्र पुरानै अवस्थामा रहेकाले जनताको पक्षमा ल्याइएका ऐन–कानुन समेत कार्यान्वयन हुन नसकेको जिकीर

काठमाडौँ । गृहमन्त्री रमेश लेखकले सशस्त्र प्रहरी बलको परिचालनलाई अझ प्रभाबकारी बनाउन जरुरी रहेको बताएका छन्‌ । सशस्त्रको मुख्यालयमा आयोजित वरिष्ठ अधिकृत सम्मेलन २०८२ को समापन समारोहलाई सम्बोधन गर्दै उनले यस्तो बताएका हुन्‌ । समारोहमा गृहमन्त्री लेखकले सशस्त्र प्रहरी बलको परिचालनलाई अझ प्रभावकारी बनाउन सम्मेलन महत्वपूर्ण रहेको चर्चा गर्दै राष्ट्रको सेवाका लागि महत्वपूर्ण जिम्मेवारी प्राप्त संगठनले सीमा सुरक्षा जस्तो संवेदनशील कार्यमा उत्कृष्ट योगदान पुर्‍याएको बताएका छन्‌ । राजश्व चुहावट नियन्त्रण, विपद् व्यवस्थापन जस्ता कार्यमा सशस्त्र प्रहरी वलको महत्वपूर्ण भूमिका र उत्कृष्ट कार्यसम्पादन रहेको उनले बताएका छन्‌ । धेरै ठाउँमा सशस्त्र प्रहरीका युनिट स्थापना गर्न आम नागरिकबाट माग आएको बताउँदै उनले यो नागरिकको विश्वास बढेको उदाहरण भएको चर्चा गर्दै उनले सीमित श्रोत साधनले काम गर्नु पर्ने अवस्था रहे पनि यसमा सशस्त्र प्रहरी बलको कार्यसम्पादन उत्कृष्ट रहेको बताएका छन्‌ । सशस्त्र प्रहरी महानिरीक्षक राजु अर्यालले सम्मेलन नतिजामुखी बनाउने र संगठनको समसामयिक विषयमा छलफल भएको बताएका छन्‌ । प्रतिबद्धतालाई कर्ममा बदल्दै राज्यले दिएको जिम्मेवारी पूरा गर्न संगठन लागिरहेको बताउँदै उनले आम नागरिकको सुरक्षा, विपद् उद्धार लगायतका कार्यमा थप प्रभावकारी कार्य गरिने बताएका छन्‌ । फिल्डमा नतिजामुखी कार्यको लागि मातहतलाई निर्देशन दिँदै उनले राजश्व संकलनमा थप निर्मम हुन जरुरी रहेको बताएका छन्‌ । यसैबीच राष्ट्रिय स्वतन्त्र पार्टी (रास्वपा)की सांसद एवं पूर्व शिक्षामन्त्री सुमना श्रेष्ठले निजी विद्यालयलाई १५ वर्षपछि गैरनाफामूलक संस्था बनाउनुपर्ने प्रस्ताव गरेकी छन्‌ । प्रतिनिधिसभा अन्तर्गत शिक्षा, स्वास्थ्य तथा सूचना प्रविधि समितिको बैठकमा विद्यालय शिक्षा विधेयक उपसमितिको प्रतिवेदनमाथि छलफल गर्दै उनले निजी विद्यालयलाई १५ वर्षपछि गैरनाफामूलक र लोककल्याणकारीमा परिणत गर्नुपर्ने बताइन्‌ । शिक्षा र स्वास्थ्य क्षेत्रलाई गैरनाफामूलक बनाउन संविधानको स्प्रिट नै रहेको जानकारी गराउँदै उनले उक्त विषय विधेयकमा समेट्न माग गरिन्‌ । उनले आफ्नो प्रस्ताव राष्ट्रियकरण नभई गैरनाफामूलक रहेको प्रष्ट पारेकी थिइन्‌ । उनले निजी शिक्षा क्षेत्र धेरै शक्तिशाली रहेको र यसअघि महत्वपूर्ण धेरै प्रतिवेदनहरू गायब बनाएको आरोपसमेत लगाएकी थिइन्‌ । त्यसैगरी नेकपा (माओवादी केन्द्र) का अध्यक्ष पुष्पकमल दाहालले पार्टीले अब ‘नयाँ युद्ध’ को थालनी गरेको घोषणा गरेका छन्‌ । उनले हतियारको लडाइँ सकिए पनि प्रणालीभित्र रहेका अदृश्य शत्रुहरूविरुद्धको संघर्ष अब सुरु भएको बताउँदै कर्मचारीतन्त्र, दलाल पुँजीवाद र बिचौलियाहरूलाई मुख्य तारो बनाइएको बताएका छन्‌ । अखिल नेपाल ट्रेड युनियन महासंघको केन्द्रीय समितिको बैठकमा बोल्दै दाहालले युद्ध र क्रान्तिबाट राजनीतिक प्रणाली परिवर्तन गरे पनि राज्य संयन्त्र (कर्मचारीतन्त्र, न्यायालय) पुरानै अवस्थामा रहेकाले जनताको पक्षमा ल्याइएका ऐन–कानुन समेत कार्यान्वयन हुन नसकेको बताएका छन्‌ । उनले आफू प्रधानमन्त्री हुँदा ल्याएको संघीय निजामती ऐन जस्ता प्रगतिशील कानुनहरूलाई यही प्रणालीले रोकेको आरोप लगाएका छन्‌ । उनले ट्रेड युनियन आन्दोलनलाई आफ्नो आधारभूत वर्गसँग पुनः जोडिएर यो ‘नयाँ युद्ध’ का लागि तयार रहन निर्देशन दिएका छन्‌ ।