देशका प्रमुख राजनीतिक दलका शीर्ष नेताहरुको सत्ता स्वार्थको आलोचना

काठमाडौं । निर्वाचन आयोगले रुपन्देही निर्वाचन क्षेत्र नं. ३ मा हुने प्रतिनिधिसभा सदस्यको उपनिर्वाचनमा भाग लिने २६ राजनीतिक दललाई निर्वाचन चिह्न निर्धारण गरेको छ । आयोगले राजपत्रमा सूचना प्रकाशित गर्दै आगामी कात्तिक १७ गते सोमबारका दिन तय भएको उपनिर्वाचनमा सहभागी हुनका लागि आयोगमा दर्ता भएका २६ राजनीतिक दललाई निर्वाचन चिह्न निर्धारण गरेको हो । नेपालको संविधानको धारा २७१ तथा राजनीतिक दलसम्बन्धी ऐन, २०७३ को दफा ४८ बमोजिम निर्वाचन आयोगले उपनिर्वाचन प्रयोजनका लागि विभिन्न राजनीतिक दललाई दर्ता गरी निर्वाचन चिह्न निर्धारण गरेको छ । प्रतिनिधिसभा सदस्य निर्वाचन ऐन, २०७४ को दफा ३१ को उपदफा (१) अनुसार दललाई निर्वाचन चिह्न प्रदान गरिएको आयोगका सचिव महादेव पन्थले जानकारी दिएका छन्‌ । यसैबीच नेकपा (एमाले) का पूर्व नेता डा. भीम रावलले देशका प्रमुख राजनीतिक दलका शीर्ष नेताहरू सत्ता स्वार्थका लागि जे पनि गर्न तयार रहेको भन्दै उनीहरुको कार्यशैलीको आलोचना गरेका छन्‌ । उनले सत्ता र पदका लागि जस्तोसुकै कदम चाल्ने तर राष्ट्रियताका सवालमा मौन बस्ने प्रवृत्तिले देशलाई कमजोर बनाएको बताएका छन्‌ । काठमाडौंमा आयोजित एक कार्यक्रमपछि सञ्चारकर्मीसँग कुरा गर्दै डा. रावलले हालै देखिएका राजनीतिक घटनाक्रमलाई लक्षित गर्दै अछामी उखान ‘पोहोर मरी सासु, अहिले आए आँसु’ को संज्ञा दिएका छन्‌ । डा. रावलले यस्ता गतिविधिहरू केवल सत्तामा रहिरहने पदलोलुप, सत्तामुखी र स्वार्थी चिन्तनको उपज भएको टिप्पणी गरेका छन्‌ । उनले केपी शर्मा ओली र शेरबहादुर देउवा लगायतका नेताहरूको गठबन्धनले आफ्नो सत्ता टिकाउनका लागि जे पनि गर्ने तर राष्ट्रिय हितका विषयमा मौन बस्ने गरेको आरोप लगाएका छन्‌ । उनले सांसदहरूलाई खाली पानामा हस्ताक्षर गराएर उनीहरूको सार्वभौम अधिकारलाई पंगु बनाउने काम भइसकेको बताउँदै विपक्षी दलहरूले यी गम्भीर विषयमा सशक्त रूपमा आवाज उठाउन नसकेको आरोप लगाएका छन्‌ । त्यसैगरी हमास समूहको नियन्त्रणमा रहेका विपिन जोशीको रिहाइमा जारी राखेको पहलका लागि विपिनकी आमा र बहिनीले परराष्ट्रमन्त्री आरजु राणा देउवालाई धन्यवाद दिँदै आगामी दिनमा थप पहल गर्न आग्रह गरेका छन्‌ । विपिनका आमा र बहिनीले परराष्ट्र मन्त्रालयमा भेट गर्दै मन्त्री राणा र परराष्ट्र मन्त्रालयले विपिनको रिहाइका लागि हालसम्म गरेको प्रयत्नका लागि आभार व्यक्त गर्दै यसलाई आगामी दिनमा थप सक्रियताका साथ निरन्तरता दिन आग्रह गरेका छन्‌ । मन्त्री राणाको पहल एवं नेपालस्थित इजरायली राजदूताबासको समन्वय तथा सहयोगमा विपिनकी आमा र बहिनी विपिनको अवस्था बुझ्न र उनको रिहाइका लागि अपिल गर्न हालै इजरायल पुगेका थिए । उनीहरुले आफूहरु इजरायलमा रहँदा त्यहाँस्थित नेपाली राजदूत प्राडा धनप्रसाद पण्डित र इजरायल सरकारका अधिकारीहरुले सहयोग गरेको र त्यहाँ राष्ट्रपतिदेखि उच्च सरकारी अधिकारीहरुसँग भेटेर विपिनको रिहाइका लागि अपिल गर्न पाएको जानकारी दिएका थिए । त्यस अवसरमा मन्त्री राणाले सरकारले विपिनको रिहाइमा सक्दो कूटनीतिक प्रयत्न गरिरहेको र आगामी दिनमा यसलाई थप सशक्त बनाउने बताइन्‌ ।