राहत र पुनर्स्थापना कोषमा साढे सात करोड रुपैया“ जम्मा

काठमाडौँ । प्रधानमन्त्री सुशीला कार्कीले पशुपतिनाथ मन्दिरको दर्शन गर्नुका साथै पूजा–अर्चना गरेकी छन्‌ । प्रधानमन्त्री कार्कीलाई पशुपतिनाथ मन्दिरमा पशुपति क्षेत्र विकास कोषका कर्मचारीले स्वागत गरेका थिए । पशुपतिनाथको दर्शन गरेपछि प्रधानमन्त्री कार्कीले सिंहदरबारमा बसेको कोष सञ्चालक परिषद् बैठकलाई सम्बोधन गर्दै धार्मिक संस्थामा धार्मिक व्यक्ति नै आवश्यक पर्ने भएकाले राजनीतिक कार्यकर्ता भर्ती गर्न नहुने बताइन्‌ । उनले मुलुकको सांस्कृतिक ऐतिहासिक सम्पदा र संस्कृतिलाई जगेर्ना गर्नुपर्नेमा जोड दिइन्‌ । यस्तो संस्थामा पनि आफ्ना पार्टीका कार्यकर्ता भर्ती गर्नु र राजनीतिको छायामा राख्न खोज्नु गलत भएको उनले बताइन्‌ । कोषको सम्पूर्ण काम कारबाहीको सञ्चालन तथा रेखदेख गर्नका लागि संस्कृति, पर्यटन तथा नागरिक उड्डयन मन्त्रीको अध्यक्षतामा पशुपति क्षेत्र विकास कोष सञ्चालक परिषद् रहने कानुनी व्यवस्था छ । प्रधानमन्त्री कार्की पर्यटनमन्त्री पनि भएकाले उनले बैठकको अध्यक्षता गरेकी हुन्‌ । यसैबीच जेन–जी आन्दोलनबाट क्षति भएका भौतिक संरचनाको पुनर्निर्माण, आर्थिक पुनरुत्थान, राहत र पुनर्स्थापनाका लागि स्थापना गरिएको कोषमा साढे ७ करोड रुपैयाँ बढी जम्मा भएको छ । आन्दोलनबाट क्षति भएका सार्वजनिक तथा सरकारी भौतिक संरचनाको पुनर्निर्माण कार्यलाई व्यवस्थित र प्रभावकारी बनाउन गठित भौतिक पुनर्निर्माण समितिका अनुसार सात करोड ५२ लाख रुपैयाँ जम्मा भएको हो । अर्थमन्त्री रामेश्वर खनालको अध्यक्षतामा बसेको समितिको बैठकले कोषमा जम्मा भएको रकम क्षतिग्रस्त सार्वजनिक संरचनाको विस्तृत इन्जिनियरिङ डिजाइन तयार गरी पुनर्निर्माणको प्रतिवेदन तयार गर्न, सार्वजनिक संरचनाको तत्काल मर्मतसम्भार गरी सेवा चालू गराउन र आर्थिक पुनरुत्थान, राहत र पुनर्स्थापनाका कार्यक्रममा खर्च गर्ने निर्णय गरेको छ । विस्तृत इन्जिनियरिङ डिजाइन तयार गरी पुनर्निर्माणको प्रतिवेदन तयार गर्न देशभरीका सरकारी तथा सार्वजनिक भवनको विस्तृत इन्जिनियरिङ डिजाइन तयार गरी पुनर्निर्माणको प्रतिवेदन तयार गर्न साढे तीन करोड रुपैयाँ विनियोजन गरिएको छ । शहरी विकास तथा भवन निर्माण विभाग र संघीय सचिवालय निर्माण तथा व्यवस्थापन कार्यालयमार्फत कार्यान्वयन हुने कार्यक्रमका लागि क्रमशः दुई करोड र साढे एक करोड रुपैयाँ विनियोजन गरिएको छ । त्यस्तै, सोही विभागबाट कार्यान्वयन हुने गरी सार्वजनिक संरचनाको तत्काल मर्मतसम्भार गरी सेवा चालू गराउन दुई करोड रुपैयाँ विनियोजन गरिएको छ । संघीय सचिवालय निर्माण तथा व्यवस्थापन कार्यालयबाट कार्यान्वयन हुने गरी सार्वजनिक संरचनाको तत्काल मर्मतसम्भार गरी सेवा चालू गराउन एक करोड रुपैयाँ विनियोजन गरिएको छ । विभागमार्फत आर्थिक पुनरुत्थान, राहत र पुनर्स्थापनाका कार्यक्रममा सञ्चालन गर्न ५० लाख रुपैयाँ विनियोजन गरिएको छ । त्यसैगरी मातृभूमि जागरण अभियान नेपालको नेतृत्व गरिरहेका भीम रावल पनि नेपाली कम्युनिष्ट पार्टीमा समाहित हुने भएका छन्‌ । नेकपा एमालेले पार्टी छोडेर गएकालाई घर फर्कन आह्वान गरे पनि अध्यक्ष ओलीले पार्टी फर्कन उचित वातावरण तयार बनाउनुपर्ने राय राख्दै आएका रावलले एमाले आफू अनुकुल नहुने बुझेपछि नव गठित नेपाली कम्युनिष्ट पार्टीसँग समाहित हुने निष्कर्षमा पुगेका हुन्‌ । रावलसँग नेपाली कम्युनिष्ट पार्टीका शीर्ष नेताले विभिन्न चरणमा छलफल गरेका थिए । एमालेले भाउ नदिरहेका बेला नव गठित पार्टीका संयोजक पुष्पकमल दाहाल तथा सहसंयोजक माधवकुमार नेपालसहितका नेतासँगको छलफलले रावललाई नयाँ पार्टी तर्फ डोहोर्‍याएको बताइएको छ । रावलको स्वागतका लागि नेपाली कम्युनिष्ट पार्टीले कार्तिक २६ गते औपचारिक कार्यक्रमको आयोजना गरिने भएको छ । राष्ट्रिय सभा गृह प्रदर्शनी मार्गमा हुने कार्यक्रम दिउँसो साढे एक बजेदेखि सञ्चालन हुने पार्टीले जनाएको छ ।