शान्तिसुरक्षा बिथोल्न खोज्ने जो कोहीलाई कडा कारबाही गर्न सरकार कटिबद्ध रहेको अभिव्यक्ति

काठमाडौं । राष्ट्रपति रामचन्द्र पौडेल माघ १८ गते जापान भ्रमणमा जाने भएका छन्‌ । प्रधानमन्त्री निवास बालुवाटारमा बसेको मन्त्रिपरिषद् बैठकले राष्ट्रपति पौडेलको जापान भ्रमण स्वीकृत गर्ने निर्णय गरेको हो । नेपाल र जापानबीचको कूटनीतिक सम्बन्ध स्थापना भएको ७०औं वर्षगाँठको उपलक्ष्यमा माघ १८ देखि २१ गतेसम्म जापानमा आयोजना हुने कार्यक्रममा सहभागी हुन राष्ट्रपति पौडेल नेतृत्वको प्रतिनिधिमण्डललाई स्वीकृति दिने निर्णय गरिएको सरकारका प्रवक्ता एवं गृहमन्त्री ओमप्रकाश अर्यालले जानकारी दिएका छन्‌ । त्यस्तै बैठकले २०८२ फागुन १ गतेदेखि लागू हुने गरी नेपाल प्रहरीको राशन स्केल र राशन बापतको दैनिक रकम वृद्धि गर्ने निर्णय गरिएको प्रवक्ता अर्यालले बताएका छन्‌ । मन्त्रिपरिषद्ले नेपाल स्टक एक्सचेन्ज लिमिटेडको पुनर्संरचना सम्बन्धी सुझाव समिति– २०८२ ले पेस गरेको प्रतिवेदन सार्वजनिक गर्ने निर्णयसमेत गरेको छ । यसैबीच गृहमन्त्री ओमप्रकाश अर्यालले सरकारले निर्वाचन सुरक्षा मजबुत बनाई भयमुक्त वातावरण निर्माण गर्ने कार्यलाई उच्च प्राथमिकता दिई काम गरिरहेको बताएका छन्‌ । आगामी फागुन २१ गते हुन गइरहेको प्रतिनिधिसभा सदस्य निर्वाचनको तयारीबारे भइरहेको गतिविधिका बारेमा जानकारी लिन निर्वाचन आयोग पुगेका उनले शान्तिसुरक्षा बिथोल्न खोज्ने जो कोहीलाई कडाभन्दा कडा कारबाही गर्न सरकार कटिबद्ध रहेको बताएका छन्‌ । मतदाता, राजनीतिक दल, उम्मेदवार, निर्वाचनमा खटिने कर्मचारी एवं सुरक्षाकर्मीलगायत सरोकार भएका सबैको सुरक्षाको भरपर्दो व्यवस्था मिलाएको गृहमन्त्री अर्यालले जानकारी गराएका छन्‌ । यसका लागि मन्त्रालयले निर्वाचन कार्यतालिकासँग तालमेल हुने गरी सुरक्षा योजना बनाई काम गरिरहेको उनको भनाइ छ । छलफलका क्रममा कार्यवाहक प्रमुख निर्वाचन आयुक्त रामप्रसाद भण्डारीले प्रतिनिधिसभा सदस्य निर्वाचन तयारीका क्रममा सरकारबाट प्राप्त सहयोग र समन्वयप्रति धन्यवाद व्यक्त गर्दै निर्वाचन व्यवस्थापनका क्रममा आयोगका तर्फबाट गरिनुपर्ने व्यवस्थापकीय तयारी सम्पन्न भएको जानकारी गराएका छन्‌ । निर्वाचन व्यवस्थापनका क्रममा संविधान, निर्वाचनसम्बन्धी कानुन, निर्वाचन आचारसंहिता विपरीत हुने कुनै पनि गतिविधि एवम् क्रियाकलापप्रति आयोग कठोर रुपमा प्रस्तुत हुने उनले बताएका छन्‌ । कुनै पनि पक्षबाट हुने दण्डहीनता आयोगलाई मान्य नहुने पनि कार्यवाहक प्रमुख आयुक्त भण्डारीको भनाइ थियो । त्यसैगरी नेपाली कांग्रेसका सभापति गगनकुमार थापाले नेतृत्व परिवर्तन भएर आएको कांग्रेस नै अहिलेको राजनीतिक मैदानमा सबैभन्दा नयाँ पार्टी रहेको दाबी गरेका छन्‌ । सर्लाहीको निर्वाचन क्षेत्र नम्बर–४ मा आयोजित चुनावी सभालाई सम्बोधन गर्दै उनले नयाँ र पुराना पार्टीको बहस चलिरहँदा माघ ६ गतेको महाधिवेशनबाट नेतृत्व फेरेको कांग्रेस नै वास्तविक अर्थमा नयाँ शक्ति भएको तर्क गरेका छन्‌ । उनले पुरानो हुँदैमा सबै खराब नहुने भन्दै इतिहास, धर्म र परम्पराका असल कुरालाई गौरवका साथ जोगाउनुपर्ने बताएका छन्‌ । यद्यपि, समयअनुसार संस्था बदलिनुपर्ने आवश्यकतालाई महसुस गर्दै आफूहरूले कांग्रेसलाई बदलेको उनको भनाइ थियो । सभापति थापाले आफूहरूले पार्टीभित्र रूपान्तरणको अभ्यास गरेको भन्दै अबको ५ वर्ष देशलाई नयाँ ठाउँमा पुर्‍याउने सपना र संकल्प बोकेर जनतामाझ आएको बताएका छन्‌ ।