काठमाडौं । कार्यवाहक प्रमुख निर्वाचन आयुक्त रामप्रसाद भण्डारीले निर्वाचनमा प्रविधिको दुरूपयोग हुन सक्ने विषयमा आयोग सचेत रहेको बताएका छन् । भण्डारीले प्रविधिको दुरूपयोगले निर्वाचन बिथोलिन सक्ने भएकाले प्रविधिको दुरूपयोग हुनसक्ने आँकलन गरेर पहिचान गरिसकेको समेत बताएका छन् । प्रविधिको दुरुपयोगले निर्वाचनलाई अत्यन्त दखल पार्ने, बिथोल्ने, निर्वाचनको माहोललाई धमिल्याउने धेरैतिरबाट प्रयास हुनसक्ने उनले बताएका छन् । निर्वाचनको नैतिकता कायम राख्न र भ्रामक प्रचार नियन्त्रणका लागि टिकटक र आयोगबीचको सहकार्यसम्बन्धी सम्झौतामा हस्ताक्षर समेत भएको छ । विश्वको नजर नेपालको निर्वाचनमा रहेकाले निर्वाचनलाई सघाउन टिकटकको सहयोग सराहनीय रहेको भण्डारीको भनाइ छ । निर्वाचनको निष्पक्षतालाई सुदृढीकरण गर्ने र सकारात्मक डिजिटल अभिव्यक्तिका लागि सुरक्षित वातावरण उपलव्ध गराउने लक्ष्य राखिएको टिकटकका प्रतिनिधिले जनाएका छन् । यसैबीच नेपाल आयल निगमले खाना पकाउने ग्यास मागभन्दा बढी आपूर्ति भइरहेको भन्दै अनावश्यक स्टक नगर्न उपभोक्तालाई अनुरोध गरेको छ । निगमले पछिल्लो समय बजारमा खाना पकाउने ग्यासको अभाव भएको भन्दै फैलिएको हल्लाको पछि नलाग्न अनुरोध गरेको छ । निगमका कार्यकारी निर्देशक डा.चण्डिकाप्रसाद भट्टले नेपालमा प्रतिदिन ९० बुलेट (१ लाख १४ हजार) सिलिण्डर एलपीजी ग्यास चाहिने बताएका छन् । जसमध्ये शनिवारदेखि मंगलबारसम्म ३ सय ६५ बुलेट ग्यास लोडिङ भएको बताएका छन् । उनले सामाजिक सञ्जालमार्फत अनावश्यक रुपमा ग्यासको स्टक नगरिदिन उपभोक्ताहरुलाई अनुरोध समेत गरेका छन् । चुनाव अवधिमा पनि यही रुपमा निरन्तर रुपमा ग्यास आपूर्ति हुने भट्टले बताएका छन् । त्यसैगरी नेपाली कांग्रेसका सभापति गगन थापाले आफूले कांग्रेसलाई बदलेको दाबी गर्दै एक पटक सोचिदिन मतदातालाई आग्रह गरेका छन् । फेसबुकमा भिडिओ सन्देश जारी गर्दै सभापति थापाले बदलिएको कांग्रेस २.० भन्दै टिप्पणी गरेका छन् । उनले भनेका छन्, ‘हामी कांग्रेसलाई बदलेर आएका छौँ । बदलिएको नेपाली कांग्रेसले देशलाई बदल्छ, ‘यो नयाँ नेपाली कांग्रेस हो, यो कांग्रेस २.० हो ।’ नयाँ कांग्रेसले पुराना राम्रा कुरा मात्रै लिएर नराम्रा कुरा छाडेको उनले बताएका छन् । उनले अगाडि भने, ‘जसले पुराना कांग्रेसका सबै असल कामलाई लिएको छ, खराब कुराहरूलाई छाडेको छ । तर नयाँ युगको नयाँ मागलाई स्वीकार गरेर अगाडि आएको छ ।’
