निर्वाचनको समयमा आवश्यक परेको खण्डमा स्वतः परिचालित हुन प्रहरीलाई निर्देशन

काठमाडौं । सर्वोच्च अदालतले संसद् विघटनविरुद्ध दायर रिट निवेदनमा फागुन ८ गते साधारण तारेख तोकेको छ । बुधबार साधारण तारेख तोकिएकाले पेशी चढ्ने अनुमान गरिएको थियो । तर, सर्वोच्चको मुद्दा शाखाले पेशी नचढाई पुनः फागुन ८ गतेलाई साधारण तारेख तोकेको हो । सर्वोच्चले पेशी नचढाएर पुनः साधारण तारेख तोकेपछि रिट निवेदकमध्येका युवराज सफलले आपत्ती जनाएका छन्‌ । उनले तारिख लिन आफूले अस्वीकार गरेको बताएका थिए । अङ्ग पुग्दा पुग्दै मुद्दाको पेशी तोक्न नसक्ने सम्मानित सर्वोच्च अदालतका मुख्य रजिस्ट्रार बिमल पौडेल, रजिस्ट्रार मान बहादुर कार्की र अर्का रिट महाशाखा प्रमुखविरुद्धमा प्रहरीमा ठगी मुद्दा दर्ता गर्ने बताइएको छ । यसअघि सर्वोच्च अदालतले संसद् विघटनसम्बन्धी रिटहरूमाथि प्रारम्भिक सुनुवाइ गर्दै विपक्षीसँग लिखित जवाफ माग गरेको थियो । सर्वोच्च अदालतमा संसद् पुनर्स्थापनाको माग गर्दै १७ वटा रिट निवेदन दर्ता छन्‌ । रिटहरूमा संसद् विघटनको निर्णय संविधानविपरीत भएको दाबी गरिएको छ । यसैबीच गत माघ ५ गते जनकपुरको एकै सभालाई सम्बोधन गरेपछि एक्लाएक्लै चुनावी प्रचारप्रसारमा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र वरिष्ठ नेता बालेन्द्र शाह फेरि एउटै मञ्चमा देखिने भएका छन्‌ । जनकपुरको सम्बोधनपछि एकाएक खुट्टामा संक्रमण भएर लामो समय आराम गरेका सभापति लामिछाने अहिले आफ्नो चुनावी क्षेत्र चितवन २ मा खटिएका छन् भने वरिष्ठ नेता बालेन्द्र आफ्नो निर्वाचन क्षेत्र झापा ५ सहित देशका विभिन्न स्थान पुगिरहेका छन्‌ । सभापति लामिछाने र वरिष्ठ नेता शाहले यहीँ फागुन ६ गते कैलालीको धनगढीमा आयोजना हुने सभालाई संयुक्त सम्बोधन गर्ने भएका हुन्‌ । निर्वाचन आयोगले आगामी फागुन ४ देखि १८ गतेसम्म चुनावी सभा गर्ने समयसीमा तोकेपछि रास्वपाले शीर्ष दुई नेतालाई एकै मञ्चबाट सम्बोधनको समय मिलाएको हो । त्यसैगरी सशस्त्र प्रहरी महानिरीक्षक राजु अर्यालले निर्वाचनको समयमा नेपाल प्रहरी वा निर्वाचनमा खटिएका कर्मचारीलाई सहयोग आवश्यक परेमा तत्काल खटिन र त्यसको लागि आदेश लिईरहन नपर्ने निर्देशन दिएका छन्‌ । माघ २७ र २८ गते गण्डकी प्रदेशका विभिन्न जिल्लामा निर्वाचन सुरक्षा स्थिति बुझ्ने क्रममा महानिरीक्षक अर्यालले भूकम्प जस्ता प्रकोपमा स्वतः परिचालन भएजस्तै निर्वाचनको समयमा पनि अन्य निकायका सुरक्षाकर्मी र निर्वाचनमा खटिएका कर्मचारीलाई आवश्यक परेको खण्डमा स्वतः परिचालित हुन र परिचालन पश्चात मुख्यालयमा जानकारी गराउनहुन निर्देशन दिएका हुन्‌ । महानिरीक्षक अर्यालले सशस्त्र प्रहरी बल नेपाल नं. २४ कालिका गण कास्की मातहत परिचालन हुने निर्वाचन प्रहरीहरुलाई समेत पूर्ण आत्मविश्वासकासाथ निर्वाचनमा परिचालन भई निर्वाचन सुरक्षामा खटिनु पर्नेमा जोड दिएका छन्‌ । निर्वाचन विथोल्न खोज्नेहरुको प्रयास विफल बनाउन सबै सुरक्षा निकायका सुरक्षाकर्मीबीच समन्वय र सहकार्य जरुरी रहेको बताउनुहुँदै उनले निश्पक्ष निर्वाचन र मतदाताको सुरक्षामा कुनै कमीकमजोरी नगर्न निर्देशन दिएका छन्‌ । महानिरीक्षक अर्यालले उच्च मनोवलकासाथ निर्वाचन सुरक्षामा खटिन र नेपाली सेना, नेपाल प्रहरी र निर्वाचन कर्मचारीहरुलाई थप मद्दत र सहयोग आवश्यक परेमा आदेश विना नै तत्काल परिचालन हुन देशैभरका युनिटलाई निर्देशन दिएको जानकारी समेत गराएका छन्‌ ।