काठमाडौं । प्रतिनिधिसभा सदस्य निर्वाचनको जारी मतगणनामा राष्ट्रिय स्वतन्त्र पार्टी (रास्वपा) हालसम्म १ सय २० क्षेत्रमा विजयी भएकोे छ । परिणामअनुसार रास्वपाका उम्मेदवारले पाँच निर्वाचन क्षेत्रमा अग्रता हासिल गरिरहेका छन् । निर्वाचन आयोगका अनुसार हालसम्म १५६ स्थानको मतगणना सार्वजनिक भएकामा नेपाली कांग्रेसले १७ क्षेत्रमा जित हासिल गरेको छ । त्यस्तै, नेकपा (एमाले) सात स्थानमा विजयी भएको छ भने तीन स्थानमा अगाडि रहेको छ । आयोगका अनुसार नेपाली कम्युनिष्ट पार्टी (नेकपा)का तर्फबाट हालसम्म सात उम्मेदवार विजयी भएका छन् । यस्तै, श्रम संस्कृति पार्टीका तीन जना उम्मेदवार विजयीभएका छन् । राष्ट्रिय प्रजातन्त्र पार्टी र स्वतन्त्र उम्मेदवार एक–एक स्थानमा विजयी भएका छन् । त्यसैगरी, प्रतिनिधिसभा सदस्यको फागुन २१ गते सम्पन्न समानुपातिक निर्वाचनतर्फ हालसम्म ५० लाख १८ हजार ६१२ मतगणना सम्पन्न भएको छ । त्यसमध्ये रास्वपाले २४ लाख ७२ हजार ९६१, कांग्रेसले आठ लाख ३६ हजार १७७, एमालेले सात लाख १५ हजार २१७ र नेकपाले तीन लाख ४० हजार ४४, राप्रपाले एक लाख ८० हजार ७९१ र श्रम संस्कृति पार्टीले एक लाख २३ हजार २४१ मत प्राप्त गरेको छ । यसैबीच निर्वाचन आयोगले धनुषा–१ को निर्वाचन परिणाम घोषणा नगर्ने निर्णय गरेको छ । आयोगले धनुषा क्षेत्र नं. १ निर्वाचन अधिकृतको कार्यालयलाई पत्राचार गरेर अदालतबाट आदेश नआएसम्म निर्वाचन परिणाम घोषणा नगर्ने निर्णय गरेको हो । आयोगले यही फागुन १८ गते धनुषा जिल्ला क्षेत्र नं. १ का राष्ट्रिय स्वतन्त्र पार्टी (रास्वपा)का उम्मेदवार किशोरी साह ‘कमल’ को उम्मेदवारी कर्जा सूचना केन्द्रको कालोसूचीमा नाम रहेको प्रमाण प्राप्त भएको भन्दै खारेज गर्ने निर्णय गरेको थियो । सो निर्णयका सम्बन्धमा सर्वोच्च अदालतमा मुद्दा परी विचाराधीन रहेकाले सो सम्बन्धमा अदालतबाट आदेश नभएसम्म धनुषा जिल्ला निर्वाचन क्षेत्र नं. १ को पहिलो हुने निर्वाचित हुने निर्वाचन प्रणालीतर्फको मत परिणाम घोषणा नगर्नु नगराउनुहुन आयोगको निर्णयअनुसार अनुरोध गरिएको उनले हस्ताक्षर गरेको पत्रमा उल्लेख छ । सम्बन्धित निर्वाचन अधिकृतको कार्यालयमा पत्र तामेल गराई सोको जानकारी आयोगसमक्ष दिन प्रदेश निर्वाचन कार्यालयलाई बोधार्थको पत्र पठाइएको पनि शाखा अधिकृत अधिकारीले बताएका छन् । हाल देशभरबाट प्राप्त भइरहेका नतिजा हेर्दा यसपटकको निर्वाचन पुराना प्रमुख राजनैतिक दलदेखि साना पार्टीसम्मका लागि निर्वाचन परिणाम प्राकृतिक विपत्तिसरह भएको छ । प्राकृतिक विपत्तिले जनधन तहसनहन गरेजस्तै प्रतिनिधिसभा निर्वाचन २०८२ एकसेएक नेता र शीर्ष तथा प्रमुख पार्टीका लागि राजनैतिक विपत्तिकै रूपमा खडा भएको छ । सबैजसो पार्टी हाँक्दै आएका, शीर्ष र प्रभावशाली नेता तथा पदाधिकारीले पराजयको सामना गर्नुपरेको छ । पछिल्लो निर्वाचनले नेपाली कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ लाई छोडेर ठूला मानिएका दलदेखि साना र तीनका नेताहरूलाई कम्तीमा ५ वर्षका लागि प्रतिनिधिसभा बाहिर पुर्याएको छ । नेकपा एमालेका अध्यक्ष केपी शर्मा ओलीले फराकिलो अंकको अकल्पनीय पराजयको सामना गर्नुपरेको छ भने सोही पार्टीका उपाध्यक्ष विष्णु पौडेल र पृथ्वी सुब्बा गुरुङ, अघिल्लो संघीय सदनका सभामुख भइसकेका देवराज घिमिरे, महासचिव शंकर पोखरेल, उपमहासचिव प्रदीप ज्ञवाली र गोकर्णराज विष्ट, सचिव महेश बस्नेतजस्ता प्रभावशाली मानिएका पदाधिकारीहरूलाई सदनबाहिरै बस्ने जनादेश प्राप्त भएको छ । पार्टी बदलेर देशसमेत बदल्ने सपना देखाएका नेपाली कांगे्रसका सभापतिले पनि नमिठो हार व्यहोर्नुपरेको छ । उहाँसँगै महामन्त्रीद्वय प्रदीप पौडेल र गुरुराज घिमिरे, सहमहामन्त्री उदयशमशेर राणा, नेता विजय गच्छदार, डा. शेखर कोइराला, डा. चन्द्रकान्त भण्डारी, प्रकाश रसाइली स्नेहीजस्ता ठूला नाम पनि प्रनिनिधिसभाबाट बाहिरिएका छन् । तत्कालीन नेपाल समाजवादी पार्टीका अध्यक्ष तथा वर्तमान नेपाली कम्युनिस्ट पार्टीका सहसंयोजक माधवकुमार नेपालले पनि यो निर्वाचनको परिणामलाई आप्mनो पक्षमा बनाउन सकेनन् । त्यसै गरी राष्ट्रिय प्रजातन्त्र पार्टीका अध्यक्ष राजेन्द्र लिङ्देन नै प्रतिनिधिसभाबाट बाहिरिनुभएको छ भने वरिष्ठ नेता कमल थापा पनि मैदान बाहिर पुग्नुभएको छ । अर्का नेता रवीन्द्र मिश्रले त पराजयपछि पार्टीको कुनै पनि पदमा नरहने गरी राजीनामा नै दिनुभएको छ । जनता समाजवादी पार्टीका अध्यक्ष उपेन्द्र यादव पनि पराजय भोग्न बाध्य हुनुभएको छ भने सोही पार्टीका शरत सिंह भण्डारी पनि पराजित हुनुभएको छ । उज्यालो नेपाल पार्टीका अध्यक्ष कुलमान घिसिङलाई पनि जनमतले संसद् बाहिर राखेको छ भने कहिल्यै पराजय नभोगेका नेपाल मजदुर किसान पार्टीका प्रेम सुवाल पहिलोपटक सदनबाट बाहिर बस्नुपर्ने भएको छ । यस सँगसँगै विभिन्न पार्टीका थुप्रै नेता यसपटकको निर्वाचनबाट पराजयको मुहार हेर्न बाध्य भएका छन् ।
