– प्रा.डा. जयराज आचार्य/ विवेक गौतम –
कतिपय मानिसहरुले यहाँ भवनहरु बनाएर पसल र गेष्टहाउसको लागि भाडामा दिएका छन् । कुरिनटारमा पनि पसलेहरु र ठेलावालाहरुको राम्रो व्यापार भएको छ । खासगरी बिदाका दिनहरुमा उनीहरुलाई भ्याईनभ्याई हुन्छ, किनकी एकैदिन ८,००० जनासम्म मनकामना दर्शन गर्न आउँछन् । केबुलकार कम्पनीका सबै कर्मचारीहरु मानिसहरुलाई बाटो देखाउने, लाइनहरु व्यवस्थापन गर्ने कार्यमा दिनभर व्यस्त हुन्छन् ।
भारतको तेलङ्गना, गुजरात, महाराष्ट्र, बिहार र मध्यप्रदेशबाट आएका पर्यटकहरुले नेपालको धार्मिक भ्रमण गर्दा पशुपतिनाथ तथा मनकामना मन्दिरको दर्शन नछुटाउने गरेको बताए । उनीहरुसँगै केबुलकारमा यात्रा गर्दा उनीहरुको सन्तुष्टि थाहा पाउन सकिन्छ । उनीहरुलाई अत्यन्त रमाइलो अनुभव भएको कुरा गर्दछन् ।
एउटा साँझ मन्दिरमा एकदमै लामो लाइन थियो । खाली खुट्टासहित लाइनमा लागेका तीर्थालुहरु केबुलकारले गर्दा मन्दिरको महत्व बढेको कुरा गर्दै थिए । त्यसमाथि सडक वरिपरिको व्यापार, मन्दिर नजिकमा रहेका होटल तथा अन्य व्यवसाय राम्रोसँग चलिरहेकाले धार्मिक पर्यटन फस्टाउँदो छ । मनकामनामा भारत लगायत भुटान, बंगलादेश, चीन, जापान लगायत युरोप र अमेरिकाबाट पनि पर्यटक आउँछन् । यो क्षेत्र एक ठूलो धार्मिक पर्यटनका रुपमा विश्वमाझ समेत स्थापित भइसकेको छ ।
लक्ष्मण बाबु एउटा ठेकेदार या निर्माण व्यवसायी मात्र थिएनन । राजनीतिक र सामाजिक चेत भएका, आफ्नो व्यापार व्यवसायलाई बजारीकरण गर्नुपर्छ भन्ने वाणिज्यशास्त्रको समेत जन्मजात ज्ञान भएका र यस विषयमा उदार हृदयले काम गर्ने मानिस थिए ।
जब लक्ष्मण बाबुले मनकामना दर्शन प्रा.लि को नामबाट मनकामना मन्दिरसम्म जाने केबुलकार बनाए, उनलाई थाहा थियो यसमा गरेको लगानी चाँडो उठाउन यस केबुलकारको उपयोग गर्ने तीर्थयात्रीहरुको संख्या पनि बढाउनुपर्छ ।
