
– अर्जुननरसिंह के.सी. –
नेपालका सबै जनता आर्थिक दृष्टिले जमिनसित सम्बन्धित भएकोले र आफू नेपालका समस्त जनताको प्रतिनिधि भएकोले नेपाली काँग्रेस आफूलाई किसानहरु वा खेतमा काम गर्नेहरुको एकमात्र प्रतिनिधि र हितैषि ठान्दछ ।
नेपालमा ठूला ठूला उद्योगधन्दा र ठूला मिल कारखानाको हाल विकास भएको छैन । यस अवस्थामा नेपाली काँग्रेसलाई यस विषयमा आफ्नो स्पष्ट नीतिको निश्चय गर्न सजिलो छ । नेपालमा उद्योग धन्दाको क्षेत्रमा ऐलेसम्म निहीत स्वार्थ को निर्माण भइसकेको छैन । नेपाली काँग्रेस विश्वास गर्दछ कि भविष्यमा नेपालमा जनताको सरकार कायम भएपछि देशको औद्योगिकरण सम्पूर्ण भार सरकारले नै लिनु पर्नेछ । नेपालमा जनताको राज्य कायम भएपछि नेपाली काँग्रेसको विचार अनुसार सरकारले वृहत् योजनाको आधारमा देशको औद्योगिकरण गर्नेछ । आफ्नो ध्येयको अनुसार नेपाली काँग्रेसले कल कारखाना वा अन्यत्र काम गर्ने मजदुर वा कर्मचारीहरुलाई न्यायोचित र यथेष्ट तलब दिलाउने छ । प्रजातन्त्रको निमित्त लड्ने नेपाली काँग्रेसको निमित्त यो भन्नु आवश्यक छैन कि उसले सबै प्रकारका मजदुरहरुलाई प्रजातन्त्रवादी सिद्धान्तको आधारमा आफ्नो संगठन गर्ने वा आफ्नो युनियन बनाउने पूर्ण स्वतन्त्रता दिलाउने छ ।
अचेलको वैज्ञानिक युगमा दुनियाँका सारा राष्ट्र आपसी सम्बन्धले जोडिएका छन् । यसकारण कुनै देशको वैदेशिक नीतिको ठूलो महत्व छ । नेपाली काँग्रेस नेपालको पूर्ण स्वतन्त्रता र सार्वभौमसत्ताको कट्टर रक्षक हुनेछ । नेपालको स्वतन्त्रता र सर्वाभौमसत्ताको रक्षा गरेर मात्र नेपाली काँग्रेस संसारका अरु राष्ट्रसित सन्धि गर्ने कुराको समर्थन गर्नेछ । भारतसित नेपालको अघिदेखि नै धार्मिक, सांस्कृतिक, राजनीतिक र आर्थिक सम्बन्ध हुँदै आएको छ । अतः हामी भारतको सबप्रकारको उन्नती चाहना गर्दै त्यससित घनिष्ट सम्बन्ध कायम राख्ने अभिलाषा गर्दछौ । नेपाल तर्फबाट भारतको अहित कदापि हुनेछैन । भारत र नेपाल एक भौगोलिक सीमामा भएकाले यो दुई देशको बीच कुनै प्रकारको विरोध हुनु लाभप्रद कुरा कदापि हुन्न । हालैमा स्वतन्त्र भएको भारतले पनि नेपालको कुनै प्रकारको कुभलो चिताउला भन्ने हामी कल्पना गर्दैनौ । जहाँसम्म नेपालको स्वतन्त्रता र गौरवमा कुनै प्रकारको कुभलो हुन्न, भारतले नेपालको वर्तमान निरंकुश राणा शासनसित गरेका सन्धिहरु पनि नेपाली काँग्रेसलाई मञ्जुर हुनेछ, नत्र भविष्यमा स्थापित हुने नेपालको प्रजातान्त्रिय सरकारले आफ्नो देश र भारतको हितको विचार गर्दै भारतसित नयाँ सन्धि गर्नुपर्नेछ । अरु देशभन्दा नेपालको विशेष घनिष्टता भारतसितै बढी भएकोले प्रजातन्त्र नेपालको अरु देशसित हुने सम्बन्ध भारतकै नीतिको अनुसार हुनेछ ।
चीनसित पनि नेपालको पुरानो सम्बन्ध छ । हाल चीनमा भएको क्रान्ति जनताबाट नै उठेको ठानेर नेपाली काँग्रेस चीनको नयाँ सरकारप्रति मैत्रीभाव राख्दछ ।
नेपालमा विदेशीहरुको चाहे सामाजिक, चाहे आर्थिक कुनै प्रकारको हस्तक्षेप नेपाली काँग्रेस मन पराउन्न । नेपालको वर्तमान निरंकुश शासनले आफूलाई अझै कायम राख्न विदेशी शक्तिलाई नेपालभित्र हुलेर सकेसम्मको सहायता लिने नीति अपनाएको देखेर नै नेपाली काँग्रेसले पनि आफ्नो नीतिको यो स्पष्ट घोषणा गरेको हो । नेपालमा विदेशी शक्तिको हस्तक्षेपको नेपाली काँग्रेस घोर विरोधी छ ।
नेपाली काँग्रेसको विचारमा नेपालले संयुक्त राष्ट्र मण्डलको को सदस्यता पाउनु पर्दछ । दुनियाँमा शान्ति कायम राख्ने उद्देश्यले बनाइएका कुनै पनि अन्तराष्ट्रिय परिषद्मा नेपालले सम्मिलित हुने कुराको हामी समर्थक छौ । हाम्रो सम्पूर्ण वैदेशिक नीतिको आधार नै विश्व शान्ति हुनेछ ।
सामरिक दृष्टिले एशियामा नेपालको ठूलो महत्व भएकाले एशियाली देशहरुको स्वतन्त्रता–संग्रामप्रति हाम्रो निकै ठूलो जवाफदेही छ ।









