
– प्रा.डा. जयराज आचार्य/ विवेक गौतम –
लक्ष्मण बाबुको मुख्य काम उच्चस्तरीय अष्ट्रियनहरुको भ्रमण र कार्यक्रमहरु संयोजन गर्ने र नेपाल भ्रमण गर्ने अष्ट्रियन नागरिकहरुलाई नेपालसम्बन्धी सूचना एवं जानकारी प्रदान गर्ने थियो । लक्ष्मण बाबुलाई वि.सं. २०६९ सालमा अष्ट्रियन सरकारले अष्ट्रियन डेकोरेसन अफ होनर इन गोल्ड नामक उच्च उपाधि प्रदान गर्यो । यो अष्ट्रिया तथा अष्ट्रियन नागरिकप्रति उनले प्रदान गरेको सेवाको मूल्यांकन गरेर दिइएको थियो । उनले सुरु गरेको मावनीय सहयोग, व्यापार र द्धिपक्षीय सम्बन्ध विस्तारको काम हालसम्म पनि उही स्तरमा कायम छ ।
लक्ष्मण बाबुको निधनपछि उनका कान्छा छोरा राजेशबाबु हाल नेपालमा अष्ट्रियाको महावाणिज्यदूत छन् । राजेश बाबु भन्छन्, मानवीय सुरक्षा एवं सेवा प्रदान गर्ने दृष्टिकोणबाट सहयोगको संस्कृति स्थापना गर्न सम्भावनाहरुको खोजी गर्नु नै हाम्रो काम हो । २०७२ सालको भूकम्प र कोरोना महामारी यस्ता घटना भए जहाँ हामीले अष्ट्रियन नागरिकहरुको सुरक्षाको अनुगमन गर्यौ । हामीले सञ्चार एवं विभिन्न सहयोगका माध्यमबाट उनीहरुको मद्दत गर्यौ । नेपाल र अष्ट्रिया, नेपाली र अष्ट्रियन नागरिकहरुबीच भएको घनिष्ठतालाई अझ सुदृढ बनाउन हामी लागि परेका छौ । हालै २०८० सालमा राजेश बाबु श्रेष्ठलाई अष्ट्रियन सरकराले अष्ट्रियन डेकोरेसन अफ होनर इन सिल्भर प्रदान गरेको छ ।
१३. बोली, व्यवहार र व्यवस्थापकीय शैली
लक्ष्मण बाबु युवावस्थामा नै बडो प्रभावकारी रुपमा कुराकानी एवं प्रस्तुति गर्दथे । गोरखाको एकताबद्ध समुदायमा उनले मानिसहरुसँग राम्रो सम्बन्ध स्थापना गरेका थिए । उनी अरुका कुरा सक्रिय रुपमा सुन्दथे र आफ्ना कुरा पनि प्रभावकारी रुपमा राख्दथे । यसरी उनले एकआपसमा समझदारी विकास गरेका थिए । उनले आफ्ना साथीभाइहरुसँग सडकका छेउमा, चोकहरुमा, चौताराहरुमा, ढुङ्गेधारामा र खुला मैदानमा उनका खुलस्त छलफल र कुराकानी गरिरहेका हुन्थे । क्रमशः









