फिल्म निर्देशनमा डेब्यू गर्दै सुमन

काठमाडौं । नेपाली फिल्मको ‘स्क्रिप्ट राइटर’को रूपमा परिचित सुमन गजमेरले अब फिल्म निर्देशनमा डेब्यू गर्ने भएका छन्‌ । उनले फिल्म ‘हाम्रो सानो घर’बाट निर्देशकीय यात्रा सुरु गर्न लागेका हुन्‌ । थिम पोस्टर सार्वजनिक गर्दै फिल्म निर्माणको घोषणा गरिएको हो । दशैंपछि छायांकन सुरु हुने फिल्मले जेनजी पुस्ताको कथा भन्ने बताइएको छ । उनका अनुसार फिल्ममा नेपाली समाजमा विद्यमान जातीय तथा वर्गीय विभेद, बदलिँदो सामाजिक सोच र नयाँ पुस्ताका आकांक्षालाई पनि प्रस्तुत गरिनेछ । ओस्कार इन्टरनेसनल कलेजबाट फिल्म लेखन तथा निर्देशन विषयमा स्नातक अध्ययन पूरा गरेका गजमेरले ‘रंगी’, ‘एक्का तीनः च्याप्टर १’, ‘शेर्वा’, र ‘भित्ते पात्रो’ जस्ता फिल्ममा लेखकको रूपमा काम गरिसकेका छन्‌ । उनीसँग ‘कठपुतली’, ‘बाबरी’, ‘महापुरुष’ र ‘बलिदान’ लगायतका फिल्ममा सहायक निर्देशकका रूपमा काम गरेको अनुभव पनि छ । निर्देशक गजमेर स्वयंको लेखन रहेको ‘हाम्रो सानो घर’को निर्माण रे अफ आर्टले गर्नेछ । यो कम्पनीले यसअघि मदन थापाको निर्देशनमा फिल्म ‘परिवार’ निर्माण गरिसकेको छ ।