काठमाडौँ । खाना पकाउने एलपी ग्यासको अभाव चर्किँदै गएपछि ग्यास विक्रेता महासङ्घ नेपालले उद्योग तथा विभिन्न नाममा सञ्चालन गरिएका बिक्री केन्द्रबाट हुने प्रत्यक्ष बिक्री तत्काल रोक्न सरकारसँग माग गरेको छ । महासङ्घका अध्यक्ष ज्ञानेश्वर अर्यालले प्रभावकारी वितरण प्रणालीलाई बेवास्ता गर्दै उद्योग तथा बिक्री केन्द्रबाटै ग्यास बिक्री गर्ने निर्णयले समस्या झन् जटिल बनाएको बताएका छन् । उनका अनुसार विक्रेता तथा डिलरमार्फत वितरण गर्नुपर्ने ग्यास अन्य माध्यमबाट बिक्री हुँदा उपभोक्ताले अनावश्यक सास्ती व्यहोर्नुपरेको छ । महासङ्घले एकातिर विक्रेतालाई पर्याप्त ग्यास उपलब्ध नगराउने र अर्कोतर्फ अनुगमनका नाममा विक्रेतालाई दुःख दिने सरकारी कार्यशैलीप्रति आपत्ति जनाएको छ । महासङ्घले विज्ञप्तिमार्फत उद्योग र विभिन्न बिक्री केन्द्रबाट प्रत्यक्ष ग्यास बिक्री गर्ने तथा अनुगमनका नाममा विक्रेतालाई अनावश्यक दुःख दिने काम तत्काल रोक्न माग गरेको हो । महासङ्घले ग्यास उद्योग तथा विभिन्न नामका बिक्री केन्द्रबाट भइरहेको प्रत्यक्ष बिक्री रोक्दै विक्रेतामार्फत मात्र ग्यास वितरणको व्यवस्था मिलाउन सरकारको ध्यानाकर्षण गराएको छ । डिलरमार्फत वितरण प्रणाली व्यवस्थित गरिए उपभोक्ताले भोगिरहेको सास्ती कम हुने र ग्यास वितरणको वास्तविक समस्या समाधान गर्न सहज हुने महासङ्घको दाबी छ । यसैबीच नेपाली कांग्रेसको संस्थापन इतर समूहले राजधानीमा भएको राष्ट्रिय भेलाबाट प्रस्तुत ५ प्रतिवेदन परिमार्जनसहित पारित गरेको छ । गत शुक्रबारबाट काठमाडौंमा जारी राष्ट्रिय भेलामा शनिबार ५ प्रतिवेदनहरू प्रस्तुत भएका थिए । भेलामा पूर्वउपसभापति विमलेन्द्र निधिले प्रस्तुत गरेको राजनीतिक प्रस्ताव, पूर्वकोषाध्यक्ष उमाकान्त चौधरीले पेस गरेको साङ्गठनिक प्रस्ताव, एनपी साउदले पेस गरेको समसामयिक नीति र विषयसम्बन्धी प्रस्ताव, डा.प्रकाशशरण महतले प्रस्तुत गरेको नेपालको आर्थिक नीतिसम्बन्धी प्रस्ताव र नेता रमेश लेखकले कानुन तथा विधानसम्बन्धी प्रस्ताव परिमार्जनसहित पारित भएका हुन् । शनिबार प्रस्तुत भएका प्रस्तावमाथि राष्ट्रिय भेलामा सहभागी भएका विभिन्न विषय र प्रदेशका आधारमा समूह विभाजन गरी छलफल गरिएको थियो । भेलामा बेल्दै पूर्वउपसभापति विमलेन्द्र निधिले नेपाली कांग्रेसको १५औँ महाधिवेशन शेरबहादुर देउवाकै नेतृत्वमा सम्पन्न गर्ने प्रस्ताव राखेको बताएका छन् । त्यस्तै, १५औं महाधिवेशनसम्म पार्टीका नियमित कामकारबाही देउवाको निर्देशनमा राष्ट्रिय भेलाका संयोजकले संयोजन गर्दै जाने निधिले बताएका छन् । त्यसतै नेता डा.प्रकाशशरण महतले पार्टीको आगामी आर्थिक मार्गचित्र स्पष्ट पार्दै प्रजातान्त्रिक समाजवादको जगमा उभिएर मुलुकको आर्थिक रूपान्तरण गर्नुपर्ने बताएका छन् । त्यस्तै कार्याक्रमलाई सम्बोधन गर्दै नेता कृष्ण प्रसाद सिटौलाले निर्वाचन आयोगले गरेको निर्णयलाई सर्वोच्च अदालतले बदर गर्नेछ भन्नेमा आफूहरू विश्वस्त रहेको बताएका छन् । उनले १४ औँ महाधिवेशनबाट निर्वाचित कार्यसमिति पुर्नबहाली हुने विश्वास व्यक्त गरेका छन् । नेता सिटौलाले संकटबाट गुज्रिरहेको देशलाई समाधान दिने जिम्मेवारी कांग्रेसको काँधमा रहेको उल्लेख गर्दै यो जिम्मेवारी पूरा गर्नका लागि बृहत एकताको खाँचो रहेको स्पष्ट पारेका छन् । नेपाली कांग्रेसको देउवा पक्षले आयोजना गरेको राष्ट्रिय भेलाले १५ औं महाधिवेशन तयारीको जिम्मा पूर्वमहामन्त्री डा.शशांक कोइरालालाई दिएको छ । त्यसैगरी नेपाली कांग्रेसका सभापति गगन थापाले बिपी कोइरालालाई नेताहरुले आफू अनुकुल व्याख्या गर्न थालेको भन्दै असन्तुष्टि जनाएका छन् । धर्म गौतमको पुस्तक ‘बिपी र विद्रोहका ती दिन’ बिमोचन गर्दै सभापति थापाले उक्त कुरा बताएका हुन् । आफ्नो विचार र योजना नहुनेहरुले बिपीको नीतिलाई आफू अनुकुल व्याख्या गर्ने गरेको उल्लेख गर्दै थापाले धर्म गौतमजस्ता व्यक्तिहरु त्यस्ता भ्रम चिर्न अघि सर्नुपर्ने बताएका छन् ।
