काठमाडौं । प्रतिनिधिसभा बैठकमा प्रधानमन्त्रीसँगको प्रत्यक्ष प्रश्नोत्तर कार्यक्रम आगामी भदौ १० गते हुने भएको छ । सभामुख डोलप्रसाद अर्यालले प्रतिनिधिसभाको बैठकमा यसबारे औपचारिक जानकारी गराएका हुन् । प्रतिनिधिसभा नियमावलीको परिच्छेद ९ मा प्रधानमन्त्री तथा मन्त्रीहरूसँग प्रश्नोत्तरसम्बन्धी व्यवस्था छ । नियमावलीअनुसार प्रधानमन्त्री वा उनको कार्यक्षेत्रसँग सम्बन्धित महत्वपूर्ण विषयमा प्रश्न सोध्नका लागि सभामुखले प्रत्येक महिनाको पहिलो हप्ताको कुनै एक दिन बैठकको पहिलो एक घण्टा समय निर्धारण गर्नुपर्ने व्यवस्था छ । सोही कानुनी व्यवस्थाबमोजिम सभामुख अर्यालले भदौ १० गतेका लागि प्रश्नोत्तरको समय तोकेका हुन् । यसैबीच ऊर्जा, जलस्रोत तथा सिँचाइ मन्त्री विराज भक्त श्रेष्ठले विद्युत् खपत वृद्धि र निर्यात विस्तारलाई प्राथमिकतामा राख्नुपर्ने बताएका छन् । नेपाल विद्युत् प्राधिकरणको ४१औँ वार्षिकोत्सवलाई सम्बोधन गर्दै उहाँले सो कुरा बताउनु भएको हो । मन्त्री श्रेष्ठले गार्हस्थ्य उपभोक्तालाई सहुलियत दरमा भरपर्दो विद्युत् उपलब्ध गराउँदै उत्पादनमूलक उद्योगलाई स्थिर दरमा विद्युत् उपलब्ध गराउनेतर्फ सरकार प्रयासरत रहेको बताएका छन् । यसबाट राष्ट्रिय उत्पादन वृद्धि र उत्पादन लागत घटाउन सहयोग पुग्ने उहाँको भनाइ थियो । वर्षायाममा बढी हुने तथा खेर जाने विद्युतको अधिकतम उपयोगका लागि मौसमी विद्युत् दर लागू गर्ने दिशामा समेत सरकारले पहल गरिरहेको समेत उहाँले जानकारी दिनुभएको छ । मन्त्री श्रेष्ठले विद्युत् उत्पादन बढाउने विषयसँगै उत्पादित विद्युतबाट आर्थिक तथा सामाजिक मूल्य सिर्जना गर्ने विषयलाई अबको प्राथमिकतामा राख्नुपर्ने बताएका छन् । सरकारले आन्तरिक विद्युत् खपत वृद्धि, प्रसारण तथा वितरण प्रणालीको सुदृढीकरण र बाह्य विद्युत् बजार विस्तारलाई समानान्तर रूपमा अघि बढाइरहेको उहाँको भनाइ थियो । त्यसैगरी नेपाली कांग्रेसका सभापति गगन थापाले आफूहरूले सरकार असफल बनोस् भन्ने नचाहेको प्रस्ट पारेका छन् । केन्द्रीय कार्यसमिति बैठकलाई सम्बोधन गर्दै सभापति थापाले कांग्रेसले सरकारलाई सचेत गराउन मात्रै चाहेको बताएका छन् । कांग्रेसले भर्खरै बनेको सरकारलाई सबै कुराको दोष दिएर गलत भाष्य बनाउन नचाहेको प्रस्ट पार्दै सभापति थापाले भने, ‘भर्खर सरकार आएको छ । हामी यी सारा कुरा अहिले नै बिग्रिए, भत्किए भन्ने भाष्य बनाउन चाहँदैनौँ । राइट ट्र्याकमा जानुपर्ने कुरा गइरहेको छैन, इन्डिकेसन ठिक भइरहेको छैन । त्यसैले राइट ट्र्याकमा जाओस् भन्नेतर्फ हामीले सचेत गराउन चाहेको हो ।’
