काठमाडौं । निर्वाचन आयोगले निर्वाचन व्यवस्थापनमा समसामयिक सुधारका लागि पूर्व प्रमुख निर्वाचन आयुक्त तथा पूर्व निर्वाचन आयुक्तहरूसँग छलफल गरेको छ । आयोगका अनुसार नवनियुक्त प्रमुख निर्वाचन आयुक्त र निर्वाचन आयुक्तहरूले पदबहाली गरेपछि निर्वाचन व्यवस्थापनमा अघि बढाएका सुधारका योजनामा पृष्ठपोषण प्राप्त गर्ने उद्देश्यले छलफल आयोजना गरिएको हो । छलफलमा निर्वाचन व्यवस्थापनका कानुनी, प्राविधिक तथा व्यवस्थापकीय सुधारलगायत विभिन्न विषयमा सुझाव लिइएको आयोगले जनाएको छ । छलफलमा पूर्व प्रमुख निर्वाचन आयुक्त तथा आयुक्तहरूले आयोगको नयाँ नेतृत्वलाई शुभकामना दिँदै निर्वाचन सञ्चालन र व्यवस्थापनका क्षेत्रमा आयोगले विगतमा हासिल गरेको साखलाई कायम राख्दै थप उचाइमा पुर्याउन सुझाव दिएका छन् । उनीहरूले निर्वाचन व्यवस्थापनका क्षेत्रमा देखिएका पछिल्ला चुनौती सम्बोधन गर्न निर्वाचनको विधि तथा प्रक्रियामा समसामयिक सुधार गर्नुपर्नेमा जोड दिएका छन् । सरोकारवालासँग निरन्तर छलफल, सूचना प्रविधिले ल्याएका सम्भावनाको उपयोग तथा पारदर्शी कार्यशैलीलाई प्राथमिकता दिनुपर्ने सुझावसमेत उनीहरूले दिएका छन् । त्यस्तै, विगतदेखि अवलम्बन गरिएका रणनीतिलाई निरन्तरता दिँदै परिवर्तित समयअनुसार आयोगको संस्थागत क्षमता अभिवृद्धि गर्नुपर्ने र सम्बन्धित निकायसँग सहकार्य बढाउनुपर्नेमा पनि पूर्व पदाधिकारीहरूले जोड दिएका छन् । कार्यक्रममा प्रमुख निर्वाचन आयुक्त मानबहादुर कार्कीले स्वच्छ, स्वतन्त्र, निष्पक्ष र विश्वसनीय निर्वाचन सम्पन्न गर्ने आयोगको जिम्मेवारी पूरा गर्न वर्तमान नेतृत्व प्रतिबद्ध रहेको बताएका छन् । यसैबीच सरकारले विदेशमा अलपत्र नेपाली नागरिकको उद्धार, राहत तथा घरफिर्तीका लागि चालु आर्थिक वर्षमा १५ करोड रुपैयाँ विनियोजन गरेको छ । उक्त बजेट सञ्चालनका लागि परराष्ट्र मन्त्रालयले तयार गरेको कार्यविधि अर्थ मन्त्रालयको स्वीकृतिको प्रतीक्षामा रहेको छ । धादिङको धुनिवेशी नगरपालिका–जुगाडी स्थायी ठेगाना भएका सन्तोष राईको कम्बोडियामा उपचारका क्रममा मृत्यु भएको र शव नेपाल ल्याउन ढिलाइ भएको विषयमा सांसद आशिका तामाङले संसदमा उठाएको प्रश्नको जवाफ दिँदै परराष्ट्रमन्त्री शिशिर खनालले यस्तो जानकारी दिएका हुन् । मन्त्री खनालका अनुसार सरकार गठन भएपछि विदेशमा अलपत्र नेपाली नागरिकको उद्धारका लागि छुट्टै स्रोतको आवश्यकता महसुस गरी अर्थ मन्त्रालयसँग बजेट व्यवस्थापनका लागि अनुरोध गरिएको थियो । सोहीअनुसार चालु आर्थिक वर्षमा १५ करोड रुपैयाँ विनियोजन भएको हो । उक्त रकम सञ्चालन गर्न ‘विदेशमा अलपत्र परेका नेपाली नागरिकको उद्धार, राहत तथा घरफिर्तीका लागि विनियोजित बजेट सञ्चालन गर्ने कार्यविधि, २०८३’ तयार गरी अर्थ मन्त्रालयमा पठाइएको मन्त्री खनालले जानकारी दिएका छन् । त्यसैगरी नेपाली कांग्रेसको केन्द्रीय कार्यसमिति बैककले सभापति गगन थापाको संयोजकत्वमा १५औं महाधिवेशन व्यवस्थापन समिति गठन गरेको छ । २४ साउनदेखि १ भदौसम्म केन्द्रीय कार्यालय सानेपामा बसेको बैठकले १५औं महाधिवेशनका लागि विभिन्न समिति गठन गर्ने निर्णय गरेको हो । यसैगरी, पार्टीका प्रवक्ता देवराज चालिसेको संयोजकत्वमा महाधिवेशन प्रचारप्रसार समिति र महामन्त्री प्रदीप पौडेलको संयोजकत्वमा विधान संशोधन समिति गठन गर्ने निर्णय कांग्रेसले गरेको छ । महाधिवेशनलाई भव्य रुपमा सम्पन्न गर्न मूल समितिले आवास, खाद्य व्यवस्था, मञ्च व्यवस्थापन, अतिथि सत्कार, स्वास्थ्यलगायत विभिन्न उपसमितिहरु गठन गर्ने प्रवक्ता देवराज चालिसेले जारी गरेको विज्ञप्तीमा उल्लेख छ ।
